英超：曼聯使出真功夫_東方日報

今晚英超獨腳戲，由弗到漏油嘅曼聯作客般尼茅夫。「紅魔」自從卡域克中途上任後愈戰愈勇，領軍9仗贏咗7場，隊長般奴費南迪斯重回攻中位置，更加助攻停不了，為穩住下屆歐聯入場券，造訪謝晒嘅般茅必定踩多腳，小讓平半必捧上盤。

（Now 621及611周六凌晨4時直播）文:法達斯維

正所謂換帥如換刀，昏庸嘅曼聯高層近年最明智決策，係及時搵卡域克接替魯賓艾摩廉教到季尾，呢位「紅魔」名宿自年頭臨危受命，取得7勝1和僅1敗佳績。隨着維拉、利物浦、車路士頻頻失分，曼聯乘機殺上第3位，爭取下屆歐聯入場券形勢大好，最重要係佢哋依家剩番聯賽戰線，一周一賽比其他勁敵着數好多，保住歐聯席位不容有失。

般茅態沉鬥志存疑
查實卡帥只係做番正常嘢，例如復用4231陣式、唔介意多打反擊、加強跑動同迫搶等。當然讓「般費」重新擔任進攻中場亦係關鍵，曼聯上仗以3比1擊敗維拉就交出2次助攻，令佢今季聯賽累積16次助攻，超越1999-2000年度球季嘅碧咸，成為「紅魔」史上單季聯賽最多助攻球員，比起英超史上單季助攻王亨利同奇雲迪布尼（各有20次），只係差4次，曼聯今季英超仲有8場，呢位隊長絕對有機會破紀錄。

相反，般茅狀態持續下滑，單計近4仗全部打和僅入1粒，可見冬窗放走翼鋒安東尼施美安，對進攻影響甚大。般茅依家位處中游，爭下屆歐洲賽又唔太輪到佢哋，亦冇乜護級壓力，無欲無求有主場之利都信唔過，季尾波戰意行先，曼聯上盤好路。

广东聘多多 gdpdd.com 广东招聘网 广东人才网 广东找工作