歐聯：車路士防線多甩漏_東方日報

歐聯聯賽重開，今晚大戰話題性十足，曾經帶領車路士3奪英超嘅「寸王」摩連奴，如今變成賓菲加主帥回歸史丹福橋球場，雖然由老闆至球員已經人面全非，但球迷們仍然愛戴「寸王」；至於利物浦則會重返創造歐聯奇迹嘅伊斯坦布爾，作客加拉塔沙雷希望重回正軌。

寸王重返史丹福賓菲加大晒
歐聯第2輪上演話題之戰，車路士主場迎戰賓菲加。今場焦點就係「The Special One」摩連奴以賓菲加主帥身分領軍回歸史丹福橋球場比賽，無論主隊球迷對佢歡迎定柴台，都係今場主角，直接令大戰氣氛升溫，加上「車仔」近期入得又失得，相信唔會有悶場，2.5球入球大機會高。（Now 638周三凌晨3時直播）文:邪神

兩隊同樣於首輪落敗，車路士作客1比3敗於拜仁慕尼黑腳下，賓菲加首輪主場2比3輸畀阿塞拜疆球隊卡拉巴克，該隊換帥好大原因都係呢場敗仗所致，雙方今輪碰頭，都想喺對方身上爭取勝仗，因此入波唔會少。

車路士防線多甩漏
論實力車路士肯定喺賓菲加之上，但佢哋近期成績直線下降，近4場1勝3負，歐聯同聯賽輸畀拜仁、曼聯同白禮頓，唯一勝仗亦只係英聯盃反勝英甲球隊林肯城，馬利斯卡雖然幫球隊連捧歐協聯同世冠盃，但今季歐聯開鑼後只見佢手忙腳亂，被外界批評能力不足而出現帥位危機，如果今場再輸畀摩連奴肯定要搵窿捐，加上球隊後防勁多漏洞，近5場全開3球或以上，成大盤客恩物，不妨再追。

至於賓菲加近期換帥，請來剛被費倫巴治解僱嘅摩連奴領軍，上任首場歐聯就重返史丹福橋球場作賽，自然話題性十足，「寸王」兩度執教車路士3奪英超冠軍，深受「車迷」擁戴，而過往佢曾有帶領波圖爆冷奪歐聯冠軍往績，如今執教葡超賓菲加再戰歐聯，自然不容小覷；最搞笑係「車仔」官方竟然藉住今次摩連奴回歸做噱頭，將主場門票提升至AA級嘅83鎊「掠水」，已經激起民憤，球迷「倒戈」支持摩連奴都唔出奇，所以大家最好就先捧入球大，再食花生睇好戲。
广东聘多多 gdpdd.com 广东招聘网 广东人才网 广东找工作