世盃外：荷蘭擦魚腩半大開餐_東方日報

世界盃外圍賽歐洲區G組，立陶宛主場迎戰荷蘭，雙方實力距離懸殊，球星如雲嘅「橙衣兵團」荷蘭贏波機會高唱入雲，預料一開賽就會搶攻，有望迅速撕破對手防線。客勝及半場客勝都熱爆燈情況下，可以向中位數1.5球嘅半場大埋手。（周一凌晨零時開賽）文:Mic少

荷蘭上仗被波蘭逼和1比1，現時3戰取得2勝1和排G組榜首，但其實同波蘭及芬蘭同分，雖然「橙衣兵團」踢少1場，但優勢並唔明顯，為爭取小組首名直接出線資格，絕對冇失分空間，必定搏盡爭勝，盡快拉開積分優勢。荷蘭今次大軍名單陣容鼎盛，鋒線上有近況大勇嘅利物浦射手加普、熱刺貴價新兵沙維西蒙斯，仲有曼城新中場核心雷恩達斯，加上助攻力極強嘅國際米蘭右翼衞杜費斯，相信可以輕易攻陷立陶宛大門。事實上，荷蘭對住弱隊亦唔會留手，曾於6月世盃外大炒馬爾他8比0，上半場已領先3球，預料立陶宛無力招架。

實力懸殊立陶宛頂唔住
至於立陶宛踢4場世盃外僅獲3和1負，當中2次同最弱嘅馬爾他交鋒都打成平手，可見兩隊同屬「魚腩」，立陶宛首次鬥荷蘭，勢必承受重大壓力。睇番立陶宛今年遇過最強對手係6月熱身賽對丹麥，結果慘吞5蛋，上半場落後3球，預料今場情況接近，中位數1.5球嘅半場大好路。
广东聘多多 gdpdd.com 广东招聘网 广东人才网 广东找工作