新特蘭主場具侵略性 阿仙奴留前鬥後吼半和_東方日報

阿仙奴衞冕開局順利，喺英超3連勝，不過今輪作客新特蘭唔易應付，事關「黑貓」上季拎到第7名佳績，主場表現突出係最大原因；阿仙奴周中經歷歐聯惡戰，僅休息3日就要作客光明球場，體力輸蝕下會先求穩陣、留前鬥後，開半場和機會高。（Now 621及611周日凌晨3時直播）文:臻贏特

阿仙奴依家經歷連續4場作客之旅，周中歐聯喺意大利苦戰1比0贏拿玻里後，馬田奧迪加特、迪格蘭賴斯等主力都踢到莫晒，今場又要飛去東北部比賽，舟車勞頓下難免要時間回氣，而且體能未必撐到90分鐘，唔夠膽喺早段搶攻，保留體力等下半場搏殺。

新特蘭主場具侵略性
「兵工廠」勝在防守堅挺，加比爾馬加希斯同大衞拉耶繼續有超卓表現，新加盟中堅安斯干沙亦極速融入，令球隊有把握可以先求不失，最近3場比賽都係半場打和。再者，阿仙奴喺作客賽事踢得特別穩陣，近4場聯賽作客有3次上半場打和。

新特蘭踢法硬淨兼體力化，主場出擊頗具侵略性，絕對有力抗衡阿仙奴進襲。事實上，「黑貓」開季1勝1和1負，成績唔算太差，佢哋唯一一次主場就係贏富咸1比0，而佢哋今季3場聯賽全開半場和，連同周中英聯盃對侯城半場悶和0比0，已經連續4場開半場和，頗為硬淨，今場不妨再追。

广东聘多多 gdpdd.com 广东招聘网 广东人才网 广东找工作