蘇哈仔：魔迷要認清現實_星島日報

新球季第一場以0:2不敵升班馬侯城，熟悉的曼聯回來了。失三分係咪世界末日？當然唔係，但要搞清楚紅魔究竟係技術性調整，還是如近季般，稍為有改善見到曙光就打回原形？
侯城以低位防守迎戰曼聯，屬於意料之內。打破密集型防守的兩個最佳途徑，分別是銳利的邊路進攻，或者用45度角傳中，由高大中鋒衝擊對方防線製造空位和混亂。紅魔呢兩瓣今場做唔到，嚴格來說係環境令到他們做唔好；在季前賽狀態銳利的阿密特迪亞路，突然因傷缺陣，他是曼聯陣中突破能力最強的球員，亦是最有辦法撕破密集防守之人，球隊要用麥比奧莫打右翼，左邊就派多古，完全用唔到邊路進攻。

而45度角傳中，亦因為陣中對抗能力最強的班捷文施斯高在備戰階段持續受傷患困擾，整個季前賽缺陣狀態欠奉，今場後備上陣發揮唔到效果。正選要用馬菲奧斯根夏，就唔可以用傳中，要繼續用地面進攻，當然無法撕破侯城的低位防守。曼聯今仗的中前場組合，唔適合破大巴陣，的確係抵輸。不過魔迷又毋須太過擔心，球隊今場幾次推進、組織和長傳都做得唔錯，之後面對一眾會踢高位壓逼的球隊，局勢會完全不同。
開咧前外界認為紅魔於新球季可以更上一層樓，甚至有力衝擊冠軍。今仗就令大家認清現實，這支曼聯暫時未有實力去破大巴陣，仍然需要時間改進才能應付不同形式的比賽，要慢慢學習。 蘇偉業

广东聘多多 gdpdd.com 广东招聘网 广东人才网 广东找工作