今晚歐聯附加賽首回合，蘇超班霸些路迪主場迎戰奧甲勁旅寧斯。些路迪一向都係地頭龍，撞正歐戰經驗麻麻嘅寧斯，今仗必藉主場之利搶先機，主勝有計。文:法達斯維
（Now 638周四凌晨3時直播）
寧斯歐戰經驗輸條街
些路迪上季內部極度混亂，搞到老帥馬田奧尼爾一季內要兩度出山救亡，終於喺煞科日反壓赫斯，保住聯賽冠軍。雖然今夏有日本國腳前田大然轉戰英超，幸好佢哋及時補入卡美路杜蘭同卡斯柏賀治，配合原有嘅射手尼格連，球隊開咧3戰全勝共入10粒，可見攻力未受影響。
些路迪不嬲都係靠主場搵食，近6次主場正式賽事贏晒，可見一斑。加上蘇超賽會為遷就幾支要出戰歐洲賽嘅球隊，將佢哋原本嚟緊周末嘅聯賽改期，等佢哋可專心應付呢一圈兩回合嘅歐洲賽，因此些路迪更可無後顧之憂，必定傾盡全力爭勝，避免重蹈上屆附加賽出局嘅覆轍。
另邊廂，寧斯上季力壓格拉茨，重奪失落61年嘅聯賽錦標，今季開咧頭3輪贏晒，狀態唔錯，喺奧甲屬超班。不過，寧斯於歐洲賽經驗一般，上屆佢哋先喺歐霸盃附加賽出局，轉戰歐協聯更7戰不勝，經驗遠遜些路迪，正所謂猛虎不及地頭蟲，更何況寧斯更加未去到猛虎級別，些路迪可藉地利先拔頭籌。
广东聘多多 gdpdd.com 广东招聘网 广东人才网 广东找工作
粤公网安备44011302004166号