2026世界盃：高手過招小心翼翼 雙牙球王戰細均力敵_東方日報

今晚世盃16強爆發「雙牙大戰」，由葡萄牙硬撼西班牙，焦點無疑落喺不老球王C朗，同球王接班人拉明耶馬正面交鋒。葡軍主帥馬天尼斯一定加強中場控制，嚴防以耶馬為首嘅「狂牛」打快攻，加上近年碰頭例少交收兼經常未分高下，既然踢法咁保守，寧捧2.5球嘅入球細。（Now 618及616周二凌晨3時直播）文:法達斯維

葡萄牙今屆世盃踢咗4仗獲2勝2和，包括日前32強反勝克羅地亞2比1，隊長C朗親自操刀成功破網，取得佢今屆第3粒，並且打破自己長達20年世盃淘汰賽入球荒，但論成隊整體表現唔算標青。

主帥馬天尼斯一向保守，明知「狂牛」王牌耶馬邊路突破力強專打快攻，必定力爭中場控制權克制對手，何況陣中有般奴費南迪斯、域天拿、祖奧尼維斯等靚牌，傳控能力有保證。

西班牙對賽冇甜頭
另邊廂，西班牙今屆世盃4戰錄3勝1和，兼且未失過波，尤其係耶馬復任正選後3場贏晒，包括32強輕取奧地利3比0嗰場，呢位巴塞小將冇入波及助攻下仍當選最佳球員，可見佢喺場上嘅影響力，未必單純喺數據上反映到出嚟。唔計熱身賽，西班牙已經保持35場正式賽事法定時間不敗，但偏偏近年對住葡萄牙就冇乜甜頭，之前5次碰頭法定時間只得1勝4和，上年歐國聯決賽交手仲喺互射12碼飲恨，當中有4次開2球或以下，似乎「雙牙大戰」例少波入，今仗淘汰賽隨時會踢得更小心，2.5球入球細係不二之選。

广东聘多多 gdpdd.com 广东招聘网 广东人才网 广东找工作