再遇非洲兵快刀斬亂麻
世盃16強重頭戲，阿根廷於周三凌晨出戰埃及，前者上仗加時驚險擊敗佛得角，幾乎老貓燒鬚，吸取教訓後，今仗再遇另一支非洲兵埃及，肯定快刀斬亂麻入多幾球搶先機，以免夜長夢多。至於埃及射手穆罕默德沙拿有傷在身，反擊力受削，阿根廷可以放膽搶攻，加上各項賽事近11場上半場全部領先，一於直取半場主勝。（Now 618及616周三凌晨零時直播）文:Mic少
今場大戰被譽為「美斯打吡」，皆因埃及王牌穆罕默德沙拿自出道以來，一直有「埃及美斯」之稱，兩人首次亦可能係最後一次世盃交鋒，特別受矚目。論近況及狀態，正牌美斯明顯勝一籌，呢位39歲阿根廷球王完全冇受年齡增長影響水準，今屆4戰都有波入，合共已有7球進帳，同法國球星基利安麥巴比及挪威鋒霸艾寧夏蘭特並列射手榜第1位，絕對係老而彌堅。
沙拿有傷埃及攻守都唔掂
撇開阿根廷最後1場分組賽例行公事對約旦，美斯後備上陣，另外3場佢擔任正選，都係射入先開紀錄1球，協助球隊上半場領先。皆因一眾隊友願意無私不斷為美斯創造入波機會，相信呢位球王今仗可以再次迅速建功。
另邊廂，埃及雖然打入16強，但過程非常艱辛，分組賽3戰只係贏過魚腩球隊新西蘭，上場32強同澳洲激戰120分鐘仍然打和1比1，最終靠互射12碼勝出。穆罕默德沙拿早前對伊朗，受傷退下火線，上仗勉強帶傷上陣，表現受影響，加上踢足全場，可能令傷勢惡化，進一步削弱埃及反擊力。
此外，埃及防線不穩，今屆4場都有失波，後衞穆哈密漢尼更加2次擺烏龍，成為世盃史上首位單屆2次攻入自己大門嘅球員，猶如「計時炸彈」，恐怕上半場抵擋唔住阿根廷強攻。
广东聘多多 gdpdd.com 广东招聘网 广东人才网 广东找工作
粤公网安备44011302004166号