今晚世盃頭場上演E組首輪賽事，4屆冠軍德國出戰人口只得15萬嘅世盃新丁庫拉索。「日耳曼兵團」吸取連續兩屆分組賽出局教訓，唔敢再輕敵，難得撞正來自中北美洲嘅冇骨魚腩庫拉索，仲唔趁熱速食？不過半場主勝冇肉食，捧1.5球半場大更上算。（Now 618及616周一凌晨1時直播）文:臻贏特
作為4屆世盃盟主，德國近2屆竟然喺分組賽即行人止步，對於呢支以往經常走到最後階段嘅大賽球隊嚟講，咁嘅成績非常羞家，而呢2屆同樣首輪輸波，令佢哋陷於被動，成為最終出局嘅關鍵，為免重蹈覆轍，今屆一定要開個靚頭，難得只係對住冇骨魚腩庫拉索，梗係數得就數。撇除不堪回首嘅近兩屆，德國喺再之前4屆首輪贏晒之餘，全部都喺上半場領先兼開2球或以上，可見初段例搶韁，加上前鋒夏維斯傷愈後逐漸上力，唔愁冇波入。
最年輕教頭Vs最老主帥
德國少帥拿高斯文以38歲之齡，成為今屆最年輕教頭，而佢今仗就對住世盃決賽周史上最老主帥、現年78歲嘅艾禾卡特，查實呢位荷蘭籍老帥本來因女兒健康問題喺年頭辭職，但因接替佢嘅魯頓領軍2場輸晒兼爆內亂，最終亦要勞動艾帥出山。不過庫拉索整體實力可能係今屆最弱嗰隊，最出名已係前曼聯青訓產品「爆炸頭」鍾達希，能夠喺世盃大舞台亮相兼同前世盃盟主交手，已經超額完成，加上近3仗都有入波同失波，相信唔會死守，對住搶韁嘅德國，半場大有計。
广东聘多多 gdpdd.com 广东招聘网 广东人才网 广东找工作
粤公网安备44011302004166号