歐聯：晉級生死戰駁火求存 拜仁鬥PSG半大出拳_東方日報

今晚上演另一場歐聯4強次回合大戰，拜仁慕尼黑主場再鬥巴黎聖日耳門（PSG）。兩隊首回合激情鬥攻，PSG險勝5比4，拜仁為收復失地，必趁地利一開波就搶攻，PSG貴為上屆盟主亦非善男信女，唔怕駁火。參考拜仁各項賽事近6場有5次上半場總入球開3球或以上，一於追中位數2.5球嘅半場大。（Now 643周四凌晨3時直播）文:Mic少

拜仁晨咁早衞冕德甲冠軍，一條心專注爭歐聯，上場聯賽正選陣容收起哈利卡尼、路易斯迪亞斯、米高奧利斯、甘美治、烏柏美卡奴及紐亞等多位主將，留力應付今場生死戰。教練高柏尼停賽完畢，可以復出喺場邊指揮，球員肯定更落力，加上主場球迷吶喊助威，勢必如猛虎出柙，只要盡快入波扳平總比數，配合地利優勢，就可以重新掌握晉級機會主動權。事實上，拜仁首回合作客巴黎，開賽17分鐘就先開紀錄，今仗「閃電」入波機會甚高。

兩隊同樣養精蓄銳
上屆歐聯冠軍PSG有一球優勢喺手，今場和波都可以殺入決賽，但呢支法甲豪門踢慣進攻足球，唔會刻意防守。教練安歷基表明會保持球隊豪邁踢法，對於有聲音批評兩隊首回合不設防，佢就嗤之以鼻：「我哋應該尊重其他人嘅意見，但對於呢啲糟糕意見，可以選擇唔理。大部分人都鍾意進攻風格，總之我哋會踢番自己最享受嘅足球，咁先有勝算。」言下之意，刻意死守可能輸晒個勢，倒不如駁火求存。

睇番PSG上場法甲同樣派大量副選出擊，結果同羅連安特踢成2比2，兩大炮台基華拉斯基利亞及奧士文尼迪比利更加全場做觀眾冇上陣，「叉足電」硬撼拜仁，兩邊都殺聲震天，半場大手交易走唔甩。

广东聘多多 gdpdd.com 广东招聘网 广东人才网 广东找工作