英超：爭霸咬實唔放 曼城主W打爆廠_東方日報

英超爭霸「天王山之戰」爆發！排第2位嘅曼城主場硬撼榜首阿仙奴。「兵工廠」領放大半季時間，最後衝刺階段再次喺壓力之下出現崩潰；相反「藍月亮」接連取得漂亮勝仗，後上氣勢凌厲，而且今場坐擁主場之利，有望一舉打沉信心低落嘅阿仙奴，主勝值博。（Now 621及611周日晚11時30分直播）文:工廠仔

英超依家爭標形勢，阿仙奴領先踢少1場嘅曼城6分，若然曼城今場贏波，兩隊失分數字將會相同。數字上「兵工廠」仍有些微優勢，但論狀態同氣勢，「藍月亮」已經完全壓倒阿仙奴；「兵工廠」喺本土賽事3連敗，包括英聯盃及英足盃出局，相反曼城則連挫今場對手阿仙奴、利物浦同車路士，狀態巔峰。

「藍月亮」喺哥迪奧拿帶領下，向來以後勁凌厲見稱，曼城近4年喺4月份聯賽未逢敗仗，哥帥領軍下4月份39場豪取31勝，而且中場卓基同小將尼高奧萊利近期大爆發，足以彌補艾寧夏蘭特「減產」影響，令對手更難防範。加上有成1個星期時間休息備戰，狀態有保證。

馬度基傷埋壓力更大
相反，「兵工廠」喺壓力下經常表現失常，雖然今場唔輸都可以保住優勢，但心態上缺乏非勝不可嘅決心，反而影響球員演出，踢法畏首畏尾，日前歐聯對士砵亭亦只係悶和0比0，信心未見提升、體能反而輸多一截，加上馬度基亦加入布卡約沙卡、馬田奧迪加特、祖利安添巴等傷兵行列，今場作客曼城，恐怕凶多吉少。

广东聘多多 gdpdd.com 广东招聘网 广东人才网 广东找工作