英超：曼聯搶宮蓄細待發_東方日報

英超冤家碰頭，曼聯主場迎戰水晶宮，「紅魔鬼」自從卡域克執教後，踢6場聯賽取得5勝1和，士氣非常高昂，的確可以睇高一線。不過，曼聯近期攻力下滑，預料小勝居多，主W太熱冇肉食，加上水晶宮各項賽事近6場有5次總入球開2球或以下，寧願博中位數2.5球嘅入球細。（Now 621周日晚10時直播）文:Mic少

曼聯換帥後，卡域克採取快速反擊戰術，整體效果唔錯，尤其係遇上崇尚進攻嘅曼城、阿仙奴，獲得大量突擊空間，創造唔少入波機會。不過，「紅魔鬼」面對弱勢主守型球隊，往往焗住改踢陣地戰，卻缺乏方法破解對手密集防線，所以近2場分別只能打和韋斯咸1比1，小勝愛華頓1比0，並且同樣踢到比賽後段先至入波，唔好期望今仗可以大勝表現硬淨嘅水晶宮。

水晶宮嚴防抗戰到底
至於水晶宮狀態有所回升，上場歐協聯附加賽次回合贏辛連斯基2比0，晉級16強，各項賽事近6場取得3勝2和1負，包括近3場英超贏2場，同樣以1比0分別小勝白禮頓、狼隊，表現四平八穩，遇上處於強勢嘅曼聯，應該會進一步加強防守，希望最起碼打和有分落袋。翻查雙方近5次交鋒，水晶宮獲得3勝1和1負，其中4場保持不失球，對於「降魔」有心得，曼聯想入波並非易事，最好揀入球細。
广东聘多多 gdpdd.com 广东招聘网 广东人才网 广东找工作