英超：力追榜首踩到盡 曼城開Turbo速破列斯聯_星島日報

英超冠軍爭逐激烈，曼城後上氣勢凌厲，周日凌晨作客列斯聯，再贏就追到只差榜首2分，向阿仙奴施加壓力，今場不勝無歸。曼城近期火力全開，經常喺半場已經領先，今仗面對防守疲弱嘅列斯聯，有望再先發制人，半場客勝值博。（Now 621及611周日凌晨1時30分直播）文:工廠仔

踏入季尾衝冠階段，曼城領隊哥迪奧拿亦慣性係呢個時候開Turbo，最近8場賽事拎到7勝1和佳績，而且每場都攻入至少2球。

全民皆兵士氣高昂
而且曼城進攻已唔再局限艾寧夏蘭特一人，馬莫殊、安東尼施美安，甚至小將尼高奧萊利都時有斬獲，進攻更加立體，球隊依家士氣高昂，有望發揮最佳水平。「藍月亮」球員年輕力壯，經常可以喺早段進行高強度逼搶，令對手難以招架。曼城最近8場賽事，有7次係贏住咁返更衣室，當中5次直頭領先2球，先下手為強嘅用意非常明顯，而且目前成效極佳，今場預計亦會照辦煮碗。

列斯聯近期3連和，仍未逃離降班漩渦，主場出擊唔會龜縮，但係佢哋今季失球數字，係目前降班區3隊以外最多嗰隊，上個月主場對阿仙奴都喺上、下半場各吞兩蛋，要抵擋曼城進襲談何容易？翻查兩隊近5場對賽，曼城全勝兼且全部喺上半場領先，半場客勝梗係要再追。
广东聘多多 gdpdd.com 广东招聘网 广东人才网 广东找工作