英聯盃：主場9連勝鋒將勁搶韁 阿仙奴半W破宮_東方日報

英聯盃8強最後一場，阿仙奴主場迎戰水晶宮，勝方將會喺4強同車路士爭奪決賽資格。阿仙奴今季增兵後人腳鼎盛，目標直指所有冠軍，英聯盃嚟到最後階段當然唔會放過，今場挾主場9連勝氣勢出擊，肯定趁對手陣腳未穩先搶攻，半場主勝有睇頭。（無綫myTV SUPER周三凌晨4時直播）文:工廠仔

阿仙奴目前喺英超同歐聯都排榜首，爭冠決心非常明顯，隨住球隊傷兵陸續回歸，人腳調動亦更加充裕，上場聯賽冇落場嘅伊比爾治伊斯、馬度基等猛將擔大旗，落到場肯定施展渾身解數，重傷復出嘅加比爾捷西斯亦愈踢愈好，鋒線選擇甚多，一眾前鋒為搶正選必全力數胡。

「兵工廠」近期3連勝，喺酋長球場出戰更加連贏9場，信心爆棚，為盡早鎖定勝局會喺早段施壓。阿仙奴近年對住水晶宮戰績彪炳，近8次對賽有7勝1和，對上5次交鋒更有4次喺上半場領先。水晶宮踢法唔擅長死守，令失波危機更加嚴重。

水晶宮5日3賽體能輸蝕
水晶宮近期硬仗連場，今場係佢哋5日內第3場比賽，上周五歐協聯先同古比斯打和2比2，48小時後就被列斯聯大炒4比1，相隔3日再作客阿仙奴，體力肯定大為輸蝕，而且伊斯美拿沙亞去咗踢非國盃，連最有力嘅反擊武器都冇埋，今場睇怕半場都頂唔住。

广东聘多多 gdpdd.com 广东招聘网 广东人才网 广东找工作