英超：富咸鬥森林搶分大過天_東方日報

今晚英超獨腳戲上演搶分騷，富咸主場鬥諾定咸森林。富咸自從重用伊美路維出任進攻中場後，攻力全面升呢；森林近期亦入得又失得，鬥攻格局捧2.5球大盤。（Now 621周二凌晨4時直播）文:法達斯維

路維「後排攻擊」煞食
季初踢得較為保守嘅富咸，主帥馬高施華為加強攻力，近期多重用伊美路維打正選，「路維仔」擅於畀波走位，亦可以自己入楔搵食，喺箭頭魯爾占美尼斯掩護下，富咸「後排攻擊」明顯有所增強，單係「路維仔」近3仗聯賽就入咗2粒。雖然呢支倫敦球隊近5仗只得2勝3負，但全開3球或以上，包括同曼城踢成4比5，唔係人咁品。

另邊廂，森林自從新帥戴治喺10月尾接手後，領軍12仗錄得7勝2和3負，比前兩任紐奴同普斯迪高路今季夾埋教咗11仗僅贏1場，表現全面反彈，當中同攻力回升有關，近8場錄得6勝2負兼入15粒，其中6場開3球或以上。兩隊目前排名唔算理想，輸多1、2場隨時跌落降班區，呢場「護級6分波」好重要，預計豁出去搶攻，捧入球大為妙。
广东聘多多 gdpdd.com 广东招聘网 广东人才网 广东找工作