英超：主場出擊專打老虎 維拉發功收服紅魔_東方日報

今晚英超焦點之戰， 阿士東維拉主場對曼聯，第3位嘅維拉走勢凌厲，各項賽事9連勝，包括擊敗榜首阿仙奴，狀態同士氣正處於巔峰，今場仲要有主場之利，必定乘勝追擊。反觀「紅魔鬼」防線弱不禁風，3位主力離隊踢非國盃，兼有卡斯米路停賽，令球隊雪上加霜，預料難逃一敗，維拉主勝值博。（Now 621及611周一凌晨零時30分直播）文:Mic少

阿士東維拉自從11月初不敵利物浦之後，就未嘗敗績，英超及歐霸盃雙線作戰連贏9場，單計近11場聯賽亦取得10勝1負，包括主場擊敗兩支爭標勁旅曼城、阿仙奴，可見維拉具備奪冠實力。

尤其係3位鋒線球員摩根羅渣士、奧尼屈堅斯、唐耶爾馬倫狀態弗到爆，近期仲頻頻入波，進攻路數多元化，令對手防不勝防。維拉近9次主場出擊全勝，地利優勢十分明顯，等閒之輩難以招架。

曼聯天殘地缺難發圍
另邊廂，曼聯繼續浮浮沉沅，近7場英超只有2勝4和1負，兩位中堅馬菲斯迪歷特、哈利馬古尼養傷之下，領隊魯賓艾摩廉用19歲小將艾登希雲擔任正選，效果甚差，上仗「紅魔鬼」喺聯賽對住下游球隊般尼茅夫，竟然失咗4球，最終打和4比4，執番1分已經算好彩，今仗遇上實力強大嘅阿士東維拉，「紅魔鬼」一旦先失守，恐怕難以收復失地。

屋漏偏逢連夜雨，曼聯兩位前鋒麥比奧莫、阿密特迪亞路同後衞馬沙拉奧都要離隊踢非國盃，中場卡斯米路亦累積足夠黃牌，今場需要停賽，前中後3線都有主力缺陣情況下，相信難以發圍，「紅魔鬼」今場全失3分機會非常大。
广东聘多多 gdpdd.com 广东招聘网 广东人才网 广东找工作