英聯盃：曼城踢法賓放捧半場Ｗ_東方日報

今晚英聯盃8強雙料娛樂，上演「全英超」戲碼，頭場曼城強勢出擊，主場鬥賓福特；「藍月亮」吸取上季四大皆空教訓後，相信踢「盃仔」都會全力以赴，誓要再嘗奪冠滋味。至於尾場上屆冠軍紐卡素即使聯賽成績欠佳，但踢英聯盃往往有出色發揮，有主場之利絕對唔赦富咸。文:Mic少

曼城踢法賓放捧半場Ｗ
今晚英聯盃8強打頭陣有曼城主場對賓福特，兩隊實力有一段距離，「藍月亮」曼城愈戰愈勇，各項賽事5連勝，合共轟入16球，展現強大攻力，往往可以先發制人，佢哋近6次主場出擊有5次上半場領先。反觀賓福特作客4連敗，恐怕無力抵擋對手強攻，一於直取曼城半場主勝。（無綫myTV SUPER周四凌晨3時30分直播）

曼城近期英超及歐聯雙線作戰，發揮依然綽綽有餘，包括歐聯作客以2比1擊敗西甲豪門皇家馬德里，上場英超大炒另一支前列球隊水晶宮3比0；前鋒艾寧夏蘭特繼續有「士哥」，近4次上陣有4球進帳，腳風非常順，加上回勇嘅菲爾科頓等中前場球員輪流發威，令對手防不勝防，所以「藍月亮」各項賽事近6次主場比賽獲得5勝1負，當中5場勝仗都係上半場領先，兼且能夠攻入對手2球，霸氣十足。英聯盃8強以淘汰賽一戰定生死，曼城更加要把握地利優勢，力爭盡快入波領先，以免夜長夢多。

賓福特作客輸到慌
另邊廂，「蜜蜂仔」賓福特人腳質素比較疲弱，球隊今季成績亦欠理想，作客發揮更見失準，近4次作客全敗而且僅入1球，包括對3支倫敦球隊水晶宮、阿仙奴、熱刺，無獨有偶都係輸0比2，同樣上半場已經落後，表現毫無招架之力。更何況賓福特今季首要目標係聯賽搶分，保住英超席位，實在無力兼顧英聯盃，難免戰意不足，今場發揮甚至可能唔及踢英超，隨時比賽早段就失守。
广东聘多多 gdpdd.com 广东招聘网 广东人才网 广东找工作