英超：恭候愛華頓食過翻尋味 曼聯閃電戰極速搶半W_東方日報

今輪英超壓軸之戰，曼聯主場火併愛華頓，「紅魔鬼」曼聯自從10月初復甦以來，大玩「閃電戰」，近5場聯賽都率先入波，並且領先上半場，表現非常搶韁。不過，要小心提防曼聯演出虎頭蛇尾，皆因近兩場都先贏後和，博半場主勝比齋W更加抵玩。（Now 621及611周二凌晨4時直播）文:Mic少

曼聯今季鋒線大換血，入球能力有明顯提升，尤其是翼鋒麥比奧莫速度快，踢法充滿侵略性，經常以個人突破，殺對手一個措手不及，包括上月作客利物浦，開波2分鐘就射入「紅軍」大門，上輪對熱刺，亦係憑呢位喀麥隆國腳上半場入波打開紀錄。曼聯「閃電戰」踢法喺奧脫福球場發揮更佳效果，近4次聯賽主場出擊全勝，兼上半場領先，其中3次開賽23分鐘內入波，既然戰術奏效，領隊魯賓艾摩廉當然會繼續沿用。

不過，曼聯防線始終唔多穩陣，近兩仗「劇本」更幾乎一樣，都係上半場領先，換邊後連失2球，臨尾再逼和2比2，出現主W回報比半場主勝低，但風險反而更高。

拖肥近4訪奧脫福全敗
另邊廂，愛華頓近兩場分別打和新特蘭，以及擊敗富咸，整體表現不俗，但作客水準大打折扣，近4場作客只有1和3負，包括不敵利物浦及曼城，名副其實遇強即屈。再睇埋「拖肥糖」近4次造訪奧脫福球場，全敗而回，其中3次上半場落後，恐怕宿命難破。
广东聘多多 gdpdd.com 广东招聘网 广东人才网 广东找工作