女歐聯：皇馬女足半大秤仙_東方日報

今晚女歐聯焦點對決，阿仙奴女足主場迎戰皇家馬德里女足。衞冕嘅阿仙奴女足今屆落筆打三更，防守又失晒魂，皇馬女足例搶韁，隨時一開波就同你駁火，上半場實多波入，半場大有計。（Now 643周四凌晨4時直播）文:法達斯維

阿仙奴女足上屆能於決賽勇挫巴塞隆拿女足封后，令好多人跌晒眼鏡，不過踏入今季明顯走下坡，各項賽事近10仗贏得3場咁大把，近3仗更加未贏過。若果單計女歐聯，阿仙奴女足頭3輪只得1勝2負，包括上輪領先2球大好形勢下，竟然以2比3反輸畀拜仁慕尼黑女足，尤其係80分鐘後連失2粒，防線演出差強人意。

女紅魔奪堡反客為主
另邊廂，皇馬女足表現則比較穩定，頭3輪女歐聯獲得2勝1和共入9球，呢支西班牙勁旅擅於搶開局，連同外圍賽在內，皇馬女足近5仗女歐聯，有4次半場開2球或以上，可見佢哋初段特別搶韁，今仗必想趁阿仙奴未企穩陣腳，一開波即搶攻，1.5球半場大捧得過。

至於早少少開波，就有禾夫斯堡女足主場對曼聯女足。禾堡女足今非昔比，近3仗只得1勝2負，包括上輪女歐聯輸畀里昂女足。相反，女紅魔今屆女歐聯表現特醒，連同外圍賽在內，近7場女歐聯贏咗6場，弗到漏油，今仗有力反客為主，客勝有計。（Now 643周四凌晨1時45分直播）
广东聘多多 gdpdd.com 广东招聘网 广东人才网 广东找工作