歐聯：多蒙特強盾細抗曼城_東方日報

今晚歐聯焦點對決，曼城於主場迎戰多蒙特。雖然「藍月亮」射手艾寧夏蘭特入波停不了，但目標太大勢成眾矢之的，多蒙特對親英超兵例保守，今仗作客更加唔敢亂攻，加上佢哋防守力強，實會擺陣守住先，3.5球入球細捧得過。（Now 639周四凌晨4時直播）文:法達斯維

兩隊唔單止頭3輪歐聯獲2勝1和，連得失球都一樣，絕對係勢均力敵。曼城的確係好弗，艾寧夏蘭特更加係頭號功臣，呢位射手近10次有為曼城披甲嘅賽事，只有一場係食白果，共轟入15球，「藍月亮」取得7勝2和1負，總共入咗24粒，即係話齋計「魔人」入波就佔咗62.5%，其實都幾誇張。換個角度去諗，呢種群星拱照「魔人」嘅打法，如果夏蘭特腳風唔順或被嘜死，曼城進攻就會立即死晒火。

夏蘭特目標太大易盯死
當然好多人會話，你嘜到夏蘭特先講喇，但多蒙特今季防守確實係大有改善，呢支夏蘭特舊東家各項賽事踢咗14場，只係失咗14粒，比起以往神經刀嘅防線，算係穩陣咗好多。佢哋喺今屆歐聯頭3輪狂轟12球，看似火力強勁，但對手只係態沉嘅祖雲達斯、畢爾包，同埋弱旅哥本哈根，今仗要造訪強敵曼城，絕對唔敢輕舉妄動。翻查紀錄，「蜜蜂兵團」近5次歐聯出戰英超球隊，全開2球或以下，其中1次就係曼城，相信今次都會先求穩陣，唔慌多波入。
广东聘多多 gdpdd.com 广东招聘网 广东人才网 广东找工作