英超：重新整合強戰雙紅會 利物浦磨利刀驅魔搶主W_東方日報

英超上演「雙紅會」利物浦主場火併曼聯，上季冠軍利物浦遭遇各項賽事3連敗，但3場都係作客，其實「紅軍」近5次主場出擊獲得全勝，加上經過近期國際賽空檔，令球隊有機會喘息，相信領隊施洛重新部署後，今仗有望反彈。反觀曼聯近兩場作客全敗，恐怕凶多吉少，利物浦主勝穩陣。（Now 621及611周日晚11時30分直播）文:Mic少

利物浦開季曾經創出各項賽事7連勝，但上月底開始突然「崩潰」，連續不敵水晶宮、加拉塔沙雷及車路士，球員狀態的確有回落迹象。不過，「紅軍」勝在根基深厚，相信可以迅速克服短期挫折。事實上，隊內多位主力近期國際賽有出色表現，例如前鋒加普日前為荷蘭踢兩場世界盃外圍賽入3球，中場蘇保斯拉爾為匈牙利上陣鬥葡萄牙，亦貢獻1入波及1次助攻。

加上日前「為國捐軀」嘅中場賴恩格雲貝治及中堅伊巴希馬干拿迪傷勢已無大礙，可以候命上陣。主帥施洛手上猛將如雲，只要發揮正常水準，勝算仍然相當高，尤其是對手係傳統宿敵曼聯，利物浦爭勝決心肯定更加強。

曼聯作客輸到慌
至於曼聯表現持續冇起色，慶幸上場英超主場擊敗新特蘭，否則領隊魯賓艾摩廉好有可能已被炒。呢位葡萄牙少帥繼續領軍，對於利物浦而言，絕對係好消息，因為艾摩廉一直拒絕改變戰術，唔好期望「紅魔鬼」可以大翻身，加上曼聯近期作客往往變成「魚腩」，今季各項賽事4場作客不勝，包括英超輸畀曼城同賓福特，合共失6球。最離譜係英聯盃作客被乙組仔甘士比淘汰，今仗造訪晏菲路球場，勢必捱打。
广东聘多多 gdpdd.com 广东招聘网 广东人才网 广东找工作