日聯盃：兩軍陷魔咒難分高下 前鋒打雷和波走唔甩_東方日報

日聯盃4強大戰首回合，川崎前鋒主場火併柏雷素爾，雙方近期表現同樣未如理想，川崎前鋒近6次主場出擊僅1勝，發揮唔出地利優勢，不宜高估。至於柏雷素爾淪為「和波專家」，近5場有4場打和，加上兩軍近6次對賽法定時間，亦有5次握手言和，不妨再選擇和波，博取高回報。（無綫myTV SUPER周三晚6時直播）文:Mic少

川崎前鋒近年成績平平無奇，大部分時間喺日職中游浮沉，今季聘請長谷部茂利執教，仍然冇明顯改善，踢33場聯賽僅得14勝11和8負，無獨有偶近2場都打和。即使川崎前鋒進身日聯盃4強，但過程亦非常艱辛，上圈8強對浦和紅鑽，兩回合法定時間都打成平手，川崎前鋒踢到次回合加時，靠博到12碼，先至驚險贏波晉級，前鋒伊利臣迪蘇沙雖然上圈日聯盃有士哥，但近期狀態有回落迹象，對進攻有一定影響，今仗遇上踢法硬淨嘅柏雷素爾，恐怕勝算更加低。

柏雷素爾作客必先死守
另邊廂，柏雷素爾早前曾錄得4連勝，氣勢如虹，可惜其後表現走下坡，並陷入「和波魔咒」，一度連續4場打和，包括9月28日聯賽作客逼和今仗對手川崎前鋒4比4，就算上場贏波，都只係小勝已跌晒Watt嘅橫濱水手1比0，贏得冇乜說服力，未有顯著改善。

睇番雙方近6次正面交鋒，有5次法定時間和波收場，其中3次川崎前鋒主場出擊，全部打和，短時間內再次同川崎前鋒碰頭，預料仍然好難分到勝負，尤其係日聯盃屬於淘汰賽，柏軍首回合先作客，應該會加強防守，力保不敗而回已經達標，等次回合返到主場再全力搏殺，今場或會出現拉鋸戰局，和波機會甚高，不妨再追。
广东聘多多 gdpdd.com 广东招聘网 广东人才网 广东找工作