英超：車仔追連勝利記求反彈 藍紅開大片_東方日報

今輪英超重頭戲，車路士主場迎戰利物浦。兩隊近況同樣飄忽，「藍戰士」已連續3場聯賽失分，幸好上場歐聯贏波，有助振奮士氣。至於「紅軍」遭遇2連敗，遇強不容再失，好彩鋒線力量仍有保證，無懼駁火，首選中位數2.5球嘅入球大。

（Now 621及611周日凌晨零時30分直播）文:Mic少

車路士自從9月中旬開始，成績大為走樣，防線表現尤其差，各項賽事近6場只有2勝1和3負，合共失11球。門將羅拔山齊士、後衞查禾查洛巴分別對曼聯、白禮頓，被球證直接出示紅牌趕出場，凸顯後防多甩漏，往往焗住以「超技術」阻止對手進攻，屬於一大隱憂，面對以攻力強勁見稱嘅利物浦，勢必承受更大壓力，隨時又犯錯。相比之下，車路士鋒線人腳鼎盛，祖奧柏度、艾斯迪華奧、安素費南迪斯都具備不俗射術，新加盟翼鋒阿歷真度加拿祖表現亦愈來愈好，車仔入波機會仍然高。

沙拿蓄銳擔正搏殺
另邊廂，利物浦原本開季順風順水，一度各項賽事7連勝，但近2場分別喺英超輸畀水晶宮，歐聯不敵加拉塔沙雷，令人大感意外。不過，紅軍始終根基深厚，相信領隊施洛有能力作出調整，令球隊重回正軌。首席射手穆罕默德沙拿上場歐聯僅後備上陣，只要佢今場擔正，應可攻破車路士大門，上場歐聯傷出嘅射手艾基迪基並冇大礙，可以披甲。

不過，利物浦防線有不利因素，門將艾利臣比加受傷，將長抖6星期，由副選馬馬達舒維利把關，難以令人放心。加上紅軍近5場比賽都有失波，而車路士近5場聯賽中，亦有4次總入球開3球或以上，今場捧入球大為妙。
广东聘多多 gdpdd.com 广东招聘网 广东人才网 广东找工作