歐聯：睇好費歷克執教嘅巴塞_東方日報

歐洲球壇最高榮譽歐聯上屆進行大革新，儘管初期受到質疑，但上屆多場精彩對決，證明畀豪門提前喺較早階段相遇，正正係呢項賽事引人入勝之處。今屆歐聯聯賽階段下周展開，32隊為名為利，必定搏甩髀。今日搵嚟曾為曼聯效力12季，並贏過英超、英足盃、社區盾及歐霸盃嘅菲爾鍾斯，幫大家提供冠軍推介。

新屆歐聯上周進行咗聯賽階段抽籤，充滿話題性。今夏離開利物浦的阿歷山大阿諾特，將隨新東家皇家馬德里重返晏菲路；曼城功勳老臣子奇雲迪布尼轉投拿玻里後，亦要作客倒戈「藍月亮」，兩大球星「愛回家」，必成球壇熱話。

除此之外，聯賽階段仲有唔少巔峰對決，包括皇馬對曼城、巴塞隆拿對巴黎聖日耳門、阿仙奴對拜仁慕尼黑等，其中上屆盟主巴黎聖日耳門抽中「地獄籤」，要鬥巴塞、拜仁、熱刺、紐卡素、阿特蘭大及利華古遜等勁旅，想衞冕真係難度甚高。

戰將成長費歷克經驗夠
雖然歐聯向來充滿變數，如果要喺現階段預測冠軍誰屬，鍾斯就睇好由費歷克執教嘅巴塞。呢位歐聯經驗豐富嘅教頭，麾下擁有羅拔利雲度夫斯基及拉明耶馬等進攻好手，上屆4強輸畀國米將會加速成長，經過戰術磨合後嘅「加泰羅尼亞巨人」，今屆會以更成熟嘅姿態衝擊歐聯冠軍。

歐聯聯賽階段每隊踢8場（4主4客），前8名直接晉級16強，第9至第24名就要踢兩回合附加賽，爭取餘下晉級席位。喺新賽制下，豪門基本上8場比賽攞到16分，就好大機會攞到前8席位，11分則能確保附加賽資格。雖然偶爾會有奇兵突圍，但進入淘汰賽後，相信賽事會回歸西歐豪門爭霸嘅傳統局面。

巴塞有「新球王」拉明耶馬助陣，值得睇高一線。

广东聘多多 gdpdd.com 广东招聘网 广东人才网 广东找工作