日聯盃：勝利船搶盃細不可擋_東方日報

6點開波賽事仲有FC橫濱對神戶勝利船，兩隊聯賽排名極之懸殊，FC橫濱深陷降班漩渦，按道理季尾最大目標係護級，不過佢哋唔會放棄爭奪日聯盃，照樣搏殺；至於勝利船早就習慣多線作戰，為咗慳力近期踢法傾向保守，加上今場只係首回合毋須去盡，入球唔會多，吼實2.5球入球細。（無綫myTV SUPER周三晚6時直播）文:邪神

FC橫濱場場搏命
FC橫濱現時排聯賽19位有降班危機，按道理無暇應付盃賽，但查實佢哋習慣做「升降機」，降班對佢哋嚟講並非世界末日，反而球員喺日職嘅日子會盡力發揮；聯賽實力分子都視日聯盃為「雞肋」，但FC橫濱就場場去盡，今屆賽事先後淘汰町田澤維亞及京都不死鳥兩支勁旅，戰鬥力唔係講笑。

神戶勝利船係上季聯賽及日皇盃「雙料冠軍」，同樣重視盃賽成績，而且早就習慣多線作戰，現時勝利船爭取聯賽3連霸之際，日聯盃同日皇盃都喺爭標路上，有機會做「3料冠軍」；今場對住FC橫濱呢支「巨人殺手」，當然不敢怠慢，首回合作客會先做好防守，加上佢哋近7場全開2球或以下，再追入球細啱數。