Will知足球：藍獅冬天Shopping攻略_星島日報

車路士近3仗只入1球並只得1分，射手高爾彭馬熄機，進攻啞火頓成新難題，而中堅班洛特巴迪亞舒尼最快2月先復出，韋斯利科芬拿有可能整季報銷，該隊買人似乎係必須。

藍戰士嘅中堅搜索名單暫時有湯姆利，呢位AC米蘭中堅今季上陣時間不穩，大家仲記得佢曾經都係車仔一分子，對狼隊射入一記「圓月彎刀」。自從去咗意大利之後表現唔錯，係A米重奪意甲嘅功臣，防守的確有顯著嘅進步。不過如果想上演《愛回家》，就要先賣走阿素迪沙斯，但有無球會肯接貨又係另一個問題。

前鋒就有高路梅安尼，呢位喺巴黎聖日耳門站唔住腳嘅前峰，手長腳長有衝刺能力，其實同尼古拉斯積遜有少少類似，又係需要人地同佢打配合，似乎要孭起球隊都係強人所難，上季巴黎40場入面得9個入波，呢半季得兩個入波，所以有消息指車路士對佢零興趣。

車路士嘅冬天Shopping攻略，似乎要補一個中堅加攻擊手，我哋繼續放長雙眼睇落去。Willhappy